Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Алексей Московский

Московский Алексей Владимирович (сцена ҫинчи ячӗ — Алексей Московский, ҫур. 1981 ҫулхи пушӑн 14-мӗшӗ, Елчĕк, Елчĕк, Чăваш Автономиллĕ Социализмлă Совет Республики, Раççей Федерациллĕ Социализмлă Совет Республики, СССР) — чăваш эстрада юрăçи, Чӑваш Республикин тава тивӗҫлӗ культура ӗҫченӗ.

Пурнӑҫӗпе ӗҫӗ-хӗлӗ

1981 ҫулхи пуш уйӑхӗн 14-мӗшӗнче Чӑваш АССРӗн Елчӗк районӗнчи Елчӗкре ҫуралнӑ.

1998 ҫулта Елчӗкри пӗтӗмӗшле пӗлӳ паракан вӑтам шкултан (педагогика класӗнчен) вӗренсе тухнӑ. Шкул ҫулӗсенче Н. С. Ефимов ертсе пынӑ «Круиз» (1996—1998) тата П. Л. Краснов ертсе пынӑ «Бригада» (1998—1999) вокалпа инструмент ансамблӗсене хутшӑннӑ.

Шкул хыҫҫӑн И. Я. Яковлев ячӗллӗ Чӑваш патшалӑх педагогика университечӗн технологипе экономика факультетне вӗренме кӗресшӗн пулнӑ, конкурс витӗр иртеймен, ҫулталӑк Елчӗк районӗнчи «Чӑвашъенкрахмал» предприятире тӗрлӗ ӗҫ пурнӑҫлакан пулса вӑй хунӑ.

1999 ҫулта И. Н. Ульянов ячӗллӗ Чӑваш патшалӑх университечӗн чӑваш филологийӗпе культура факультетне вӗренме кӗнӗ[1], специализацине «Халӑх ташши» суйласа илнӗ. 1999 ҫулта Алексей Московскийпе Сергей Тарасов «Самант» ушкӑн йӗркеленӗ. Сергей Тарасовпа иккӗшӗ вӗсем шкулта вӗреннӗ чухнех «Круиз» ушкӑнра пӗрле юрланӑ. Каярах пӗр курсра вӗренекен Николай Пыркинпа «Астар» вокалпа инструмент ансамбльне йӗркеленӗ, ялсем тӑрӑх концертсемпе ҫӳренӗ. Университетра вӗреннӗ чухне КВН(выр.)чăв. вӑййисене, «Студентсен ҫуркунни» конкурс-фестивале, ытти мероприятисене хастар хутшӑннӑ.

Ушкӑн арканнӑ хыҫҫӑн Алексей харпӑр карьерине пуҫланӑ. 2003 ҫулта Пӗтӗм чӑвашсен «Кӗмӗл сасӑ» юрӑ конкурсӗн лауреачӗ пулса тӑнӑ[1]. Ҫакӑ унӑн пултарулӑх пурнӑҫӗнче тӗп вырӑн йышӑннӑ та. 2005 ҫулхи ака уйӑхӗн 24-мӗшӗнче 1-мӗш альбомӗ кун ҫути курнӑ. Шупашкар хулин чи пысӑк залӗнче пӗрремӗш концерчӗ иртнӗ.

Гастрольсемпе Пушкӑртстанра, Тутарстанра (Хусан, Ҫырчалли, Лениногорск, Анат Кама, Теччӗ, Пӑва, Нурлат …), Удмуртире, Чӗмпӗр, Димитровград, Тӗмен, Томск, Нижневартовск(выр.)чăв., Нефтеюганск(выр.)чăв., Сургут, Питӗр, Мускав тата ытти хулапа регионта пулнӑ. 2006 ҫулхи раштав уйӑхӗнче иккӗмӗш диск кӑларнӑ. Алексей Московский радиопа телевиденин чӑваш хит-парачӗсенче(выр.)чăв. малти вырӑнӗсене хӑвӑрт йышӑннӑ. 2008 ҫулта виҫҫӗмӗш диск кун ҫути курнӑ. Ку альбомра Дипендра Манипе (Непал), Залиф Биксалинпа (Узбекистан) пӗрле ҫырнӑ хайлавсем, ҫавӑн пекех халӑх чӑваш юррисем пур.

Нумай юррин сӑмахӗсене Валерий Раштав (Самойлов) поэт хайланӑ, кӗввисене Сергей Марков композитор хайланӑ.

Паллӑ юррисем: «Чу-Ча-Ча», «Эс ăçта?», «Манса кай», «Аслӑ тӗнче», «Çуралнă ял», «Чун савни», «Юрату-ырату», «Эс чи чапли» тата ыттисем те.

Евгений Григорьев шоуменпа «Тăван радиора» «Чалт кăна» кӑларӑм хатӗрлесе ертсе пырать. Малтан ҫак ятпах кӗске шӳтлӗ видеороликсем ӳкернӗ. 3 видеоверси хыҫҫӑн дискотека варианчӗ ҫуралнӑ, кайран — радио хумӗсенчи тӳрӗ эфир кӑларӑмӗ[2].

«Чи лайӑх чӑваш клипӗн» авторӗсенчен пӗри, унти — тӗп сӑнар.

«Пасаркасси мыскари» камитре ӳкерӗннӗ.

Ҫамрӑк юрӑҫсене сцена ҫине тухма пулӑшать: Андрей Думилинпа пилӗк ҫул ӗҫленӗ, тепӗр унӑн вӗренекенӗ — Денис Павлов[3].

2025 ҫулхи юпа уйӑхӗн 30-мӗшӗнче Чӑваш Республикин Пуҫлӑхӗ Олег Николаев 207-мӗш хушӑвӗпе Алексей Владимирович Московский «Эстрада юрӑҫисен пӗрлӗхӗн» пайташне «Чӑваш Республикин тава тивӗҫлӗ артисчӗ» хисеплӗ ят парса чысланӑ[4].

Обществӑлла ӗҫӗ-хӗлӗ

  • Елчӗк районӗнче ҫуралса ӳснисен «Елчӗксем» ентешлӗхӗн ӗҫ-хӗлне хастар хутшӑнать.
  • Ятарлӑ ҫар операцийӗ валли ҫар пулӑшӑвӗ пухас ӗҫе хутшӑнать.
  • Ятарлӑ ҫар операцийӗ валли укҫа-тенкӗ пухас тӗллевпе йӗркелекен ыркӑмӑллӑх концерчӗсене йӗркелет[5], ҫавӑн пекех ытти ыркӑмӑллӑх концерчӗсене хутшӑнать[6].

Хисепӗсем

  • Чӑваш Республикин тава тивӗҫлӗ культура ӗҫченӗ (2018)[7];
  • Чӑваш Республикин тава тивӗҫлӗ артисчӗ (2025, юпа, 30)[4].

Ҫемье

Авланнă, арăмӗ — Регина, Чӑваш Республикин Ҫӗрпӳ районӗнчи Опытнӑй ялӗнчен. Регина Московская хӑй те сцена ҫинче юрлать, Алексей Московский юрӑҫӑн концерт тата финанс директорӗн тивӗҫӗсене пурнӑҫлать.

Мӑшӑр 2004 ҫул вӗҫӗнче Ҫӗнӗ Ҫул концертӗнче паллашнӑ. 2005 ҫула пӗр кӗрекере кӗтсе илнӗ.

Ҫемьере виҫӗ ача — Богдан, Яна, Ярослава[2].

Кӑсӑклану

  • Юрӑҫ спортпа туслӑ.
  • Пулӑ тытма юратать. Пулӑ тытма Аҫтӑрхана та ҫитет, юлташӗсемпе каҫхине Атӑл е пӗр-пӗр кӳлӗ, юханшыв хӗррине кӑмӑлтан кайса ларать[8].

Ӑнлантарусем

  1. ^ 1, 2 Алексей Владимирович Московский (выр.). Чувашский государственный университет им. И. Н. Ульянова. Пӑхнӑ кун: 2025 ҫулхи авӑнӑн 6-мӗшӗ.
  2. ^ 1, 2 Татьяна Александрова. Алексей Московский: «Аплодисменты шумерлинцев — особенные» (выр.). Газета «Вперёд» Шумерлинского района Чувашской Республики. Пӑхнӑ кун: 2025 ҫулхи авӑнӑн 6-мӗшӗ.
  3. ^ Регина Максимова. «Чу-ча-ча» Алексея Московского. Звезда чувашской эстрады рассказал о своем творчестве (выр.). Издательский дом «Грани» (29 кӑрлачӑн 2022). Пӑхнӑ кун: 2025 ҫулхи авӑнӑн 6-мӗшӗ.
  4. ^ 1, 2 О награждении государственными наградами Чувашской Республики (выр.). Официальный портал органов власти Чувашской Республики (30 юпан 2025). Пӑхнӑ кун: 2025 ҫулхи кӑрлачӑн 11-мӗшӗ.
  5. ^ В Яльчикском муниципальном округе артисты чувашской эстрады в очередной раз организовали благотворительный концерт в поддержку участникам СВО (выр.). ВКонтакте. Единая Россия | Яльчикский округ (15 нарӑсӑн 2024). Пӑхнӑ кун: 2026 ҫулхи акан 22-мӗшӗ.
  6. ^ Состоялся благотворительный концерт в помощь строительству храма в селе Лащ-Таяба (выр.). Электронное периодическое издание Чебоксары.ру (15 утӑн 2016). Пӑхнӑ кун: 2026 ҫулхи акан 22-мӗшӗ.
  7. ^ С наградой! (выр.). Газета «Советская Чувашия» (18 юпан 2018). Пӑхнӑ кун: 2025 ҫулхи чӳкӗн 1-мӗшӗ.
  8. ^ Елизавета Петрова. Звезда местной эстрады Алексей Московский: "Пел на «бис» песни «Чу-ча-ча» и «Эс ăçта?» в Москве" (выр.). Новости Чувашии (21 ҫӗртмен 2024). Пӑхнӑ кун: 2025 ҫулхи авӑнӑн 6-мӗшӗ.

Каçăсем

Темӑпа ҫыхӑннисем

Категорисем